Qızını qaçıran şəxsin atasından 120 min istədi: 50 min aldı, sonra da öldürdü

Ali Məhkəmədə qətl törətməkdə təqsirləndirilən Rəhman Cavadovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Ələsgər Novruzovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti edilməyib.

İttihama görə, hadisə Xaçmaz rayonunda qıza görə baş verib. Belə ki, 1967-ci il təvəllüdlü İlham Rüstəmovun oğlu Xalid Rüstəmov 2020-ci ildə ailə qursa da, 2024-cü ildə sosial şəbəkədə Fatimə adlı yeniyetmə qızla tanış olub. O, bir müddət qızla danışaraq onu sevdiyini və ailə qurmaq istədiyini bildirib. Fatimə də Xalidə inanaraq bu barədə ata-anasına məlumat verib. Fatimənin anası Xalidə qızından uzaq durmağı tapşırsa da, Xalid onun sözünü eşitməyib və Fatiməni sevdiyini deyib. Fatimə də ailə üzvlərinin sözünə qulaq asmayıb və Xalidlə sevgi münasibətləri başlayıb.

Xalid bir dəfə Bakıya gələrkən yolda Fatiməyə zəng vurub danışıb. Fatimə bildirib ki, o da evdən qaçıb Bakıya gələcək və onunla evlənəcək. Fatimə evdən qaçaraq Bakıya rəfiqəsigilə gəlib və Xalidi həmin ünvana çağırıb. Bundan sonra Xalid ona evli olduğunu bildirib. Xalid deyib ki, o, ailəli olsa da, həyat yoldaşını sevmir, Fatimə ilə evlənmək istəyir. Xalid Fatiməni götürüb Bakıda xalasıgilin evinə aparıb və orda qalacaqlarını deyib. Bundan sonra Fatimə evlərinə zəng vuraraq, valideynlərinə söyləyib ki, o, Xalidlə ailə həyatı qurub.

Məsələ ilə bağlı Fatimənin atası Rəhman Cavadov Xalidin atası İlham Rüstəmovla görüşüb, qızını geri qaytarmağı tələb edib. O bildirib ki, Xalid evli olduğu üçün onun qızı ilə ailə həyatı qura bilməz. İlham Rüstəmov isə bildirib ki, İslam dinində bir nəfərin iki dəfə evlənməsinə icazə var və onlar dini kəbin kəsdirə bilərlər.

Valideynlə arasında əldə edilən razılığa əsasən, Xalidlə Fatimə dini kəbin kəsdiriblər.

Rəhman Cavadov bildirib ki, əgər Xalid onun qızını boşasa, o, Xalidi öldürəcək. Valideynlər arasında bu cür razılıq əldə ediləndən sonra Xalidlə Fatimə Bakıda xalasıgilin evində yaşamağa davam ediblər.

Bir həftədən sonra Xalid Fatiməni xalasının evindən götürərək yenidən rəfiqəsinin evinə gətirib. Xalid bildirib ki, işləri ilə bağlı rayona gedir, bir neçə günə ailəsini boşayıb, onun yanına qayıdacaq. Amma hadisədən bir ay keçməsinə baxmayaraq, Xalid geri qayıtmayıb.

Bunu eşidən Rəhman Cavadov İlham Rüstəmovla görüşüb, məsələni həll etmək istəyib. Rəhman Cavadov İlham Rüstəmovdan 50 min manat tələb edib. İlham Rüstəmov onunla razılaşıb, bankdan pul götürərək qızın atasına 50 min manat verib.

Hadisədən bir neçə gün sonra Rəhman yenidən İlhama zəng edərək onu və oğlunu ölümlə hədələyib, ondan 70 min manat tələb edib. İlham ona verməyə pulu olmadığını bildirib.

Hadisədən əsəbiləşən Rəhman evlərindən bıçaq götürərək, İlhamın iş yerinin qarşısına gedib, həyətdə dayanaraq, onun nahar fasiləsinə çıxmasını gözləyib. İlham Rüstəmov ofisdən nahar fasiləsinə çıxarkən Rəhman onun qarşısını kəsib və oğlu Xalidin yerini soruşub. İlham isə ona “bizim ailəmizdən əl çək, narahat etmə” deyib. Elə bu vaxt Rəhman əlindəki bıçaqla İlhama zərbə endirib. O, İlham Rüstəmovu 19 bıçaq zərbəsi ilə qətlə yetirib.

Polis əməkdaşlarının keçirdikləri əməliyyat nəticəsində Rəhman Cavadov saxlanılıb və barəsində həbs qətimkan tədbiri seçilib.

Sumqayıt Ağır Cinayətlər Məhkəməsinin hökmü ilə Rəhman Cavadov 17 il müddətinə azadlıqdan məhrum edilib.

Kamal Məmmədov

Tarix: 15 Oktyabr 2026, 08:51

Xəbər lenti